Klūmbewingi antistin

Klūmbewingi antistin - ast dāniskas gārbikas peisātan ezze Hansu Krisțānan Andersenan en 11 Lapkrūtin 1843 mettas.

Ēnturs

Kāigi grazzu bēi en kāimu! Bēi daggas sirdan! Ruggis bēi geltaīnan, wizē - zallin, kraīsan na zallin weisijjan lazinnusis dei en kupstans, gāndars neikaūwa na ilgans, wūrmins naggins be pluškīwuns egiptiskai, beggi tāns mukinnuns si šan billin ezze mūterei. Zūrgi weisijjans be laūkans bēi debīkai medēi, adder en medīmans bēi gilwāi azarāi - tīt, en kāimu bēi perarwi grazzu. En Saūlis zarrei, ebzūrgintan sen gilluns rawwans, stalāi wūrs dwars; ezze mūru ērgi undas krāntan aūgusis klattan lapāi, adder bēi tīt debīkan, kāi pa ukamūisesamans mazēi tilptwei stalīntei malnīkai; bēi di stwen tīt pāustiskai, kāigi en ukakāmstuišasmu meddin.

En šismu kāmstu sindēi en swajjai ligzdan na pāutans ants. Tenā preiilginau, beggi sta wērau ilgai be rettai kas ast tennan kāimalukiwuns; kittas antis ēmpirsin tensijja plūtwei en kanālamans nikāi enēitwei pa klattan lappans, kāi waițālai sen tennan. Be ēnwangan aīns pāuts per āntran pagaūwuns spīltwei, bēi di kirdītan "pīp, pīp!", wisāi gaiwinnusis si be erlāngusis galwikans.

"Gak, lak!" - bilīwusi ants, adder antistēi karwaūwa tīt kāigi mukēi ukakalsīwingiskais be pa zallimans lappans dirēi en wissans pāusans; mūti dāi tenēimans kelli tenēi tēr kwaitīwusis, beggi zalli bārwi ast kailūstan per akkins.

- Kāigi swītan ast debīkan! - bilāi antistēi, beggi bēi tenēimans brewīngeis nikāi pirzdau, kaddan tenēi lanzēi en keūtawamans.

- Mīritei jūs, kāi sta ast pastippan swītan? - prasīwusi mūti. - Swītan ēmpirsin sadinna si tāli en āntrasmu saddas delīku, ērgi pastōras laūkan, adder as nikwēi ni bēi stwen dabber. Astei jūs jāu wisāi? - Panzdau etskīja. - Ni, sta dabber ni wisāi; ukamūisess pāuts dabber ni ast spillus. Kāigi ilgai turri di wērautwei? Jāu mennei perarwi sūit stesse! - Be etkūmps sīda.

- Nū, ka ast nawwan? - prasīwusi wurā ants, kawīda pergūbi kāimalukitun tennan.

- Sen aīnan ēit di ukailgais! - etrāwusi ants sindantī na pāutans. - pastippai ni kwaitēi etwertun si. Adder dirēis na kittans. Sta ast ukagrazzuišai antistēi, kawīdans as ainuntkaddan widāi. Wisāi ast palīgu tāwu: šismu lurban. Pastippan tāns ni perēit prēi min!

- Waidinnais mennei pāutan, kawīds ni kwaitēi spīltwei - bilīwusi stāi wurāi. - Tu mazzi māim druwītwei, kāi sta ast kalkūnas pāuts. Niainawārst paikēi dei min tīt, be panzdau as turēi tūlin prōblamans sen līkutanins, beggi tenēi bijāi ezze undu. Ni mazēi stan enwaldītun, as breūwa, tēlki, krīksti, adder sta nika ni pagalbus. Waidinnais mi šan pāutan! Jā, sta ast kalkūnas. Pawērpjais tennan be mukinnais likkin plūtwei!

- Nū, as wīrst dabber biskin na tennan sindīwusi - bilīwusi ants. - Tīt ilgai as jāu sindēi, kāi as mazzi dabber delli dēinans izstalītun!

- Kāigi tu mīri! - etbilāi wurā ants be augūbi.

Ēnwangan debīks pāuts spilla. "Pīp, pīp!" - pīki pippelistin be izgūbi; bēi spārtai debīkan be klūmbewingi. Ants endirēi tennan.

- Kāigi šin antistin ast debīkan - bilāi. - Nipalīgu niainasmu kittan. Adder arwiskai sta ni ast kalkūnas pippelistin? Nū, nilgai wīrstmai ezze stan endrūwinusis si. Turri enēitwei en undan, īr ik as turīlai subba tennan stwen enbreūtun.

Ankstaīnan bēi grazzus wins; saūli swāiksti na debīkans klattan lappans. Mūti-ants ēmpiri sen pastippan sēimin augūbusi prei kanālin. Plunk! Ast ensākusi en undan. "Gak, lak!" be aīnan antistin per āntran plunkina en undan. Undan perlaīja tenēimans galwans, adder izreizan tenēi erlāngusis dins be plūwusis rikīwiskai; naggis subbas skatēi, wisāi bēi en undu, īr klūmbewingi, sīwan antistin plūwusi ēmpiri sen kittans.

- Ni, sta ni ast kalkūns! - bilīwusi ants. - Dirēis tēr, kāigi grazzu pabanginna sen naggins, kāigi entikriskai lāika si. Sta ast māise subse malnīks. Wangiskai, ik labbai na tennan dirītwei, tāns ast pastippai grazzu. Gak, lak! Jaīti teinū sēn min, as wīrst enweddusi wans en swītan, preistatinnusi wans na padwarrin, adder lāikaiti si wisaddan taūwu, kāi niaīns ni trēmplai nō wans, be sergēiti si ezze kattai!

Tenēi ast pergūbusis na padwarrin. Stwen bēi debīks karwaūks, beggi dwāi sēimjas kalbīwušas ezze angures galwan, kawīdan ēnwangan ast gābusi katta.

- Wīditei; kāigi audāi di si en šismu swītan! - bilīwusi mūti-ants eblāizinantei sebbei snappan, beggi dīgi tenā turēi kwāitan na angures galwan. - Pabanginnaiti sen naggins - bilīwusi - suppaiti be lānkeiti si šissei wūran antin, tenā ast ukaauktumman iz wissans, kawīdas ast stwi. Turri ēn sin špāniskan krāujan be stesse paggan ast tīt stāran; wīditei, tenā turri na naggin wanzātan wūrmin sudrīkan. Sta ast ukaaūktaisi teīsi, kawīdan ants mazzi gaūtun, sta zentli, kāi bijja dei kāi tenā ni prapallai be kāi zmūnei be zwīrei wīrst mazīwusis šlaitīntun tennan ezze kitēimans antins. Suppaiti! Naggins stalīntun ni en sirdan. Labbai paaugīntan antistin stalinna naggins plattu kāigi mūti be tāws. Tīt, adder teinū lankāiti galwan be bilāiti: Gak!

- Tīt tenēi ast segīwusis. Adder kittas antis dirīwusis na tennans be bilīwušas kalsīwingiskai:

- Ak Dēiwe, pēr ka nūmans ši ginnija? Ikāigi mes ni būlimai sūit. Pfe, kāigi šin antistin pawaidinna! Mes ni kwaitēimai tennan stwi sirzdau mans turītun! - Be izreizan ainā ezze antimans ast preiskrāidusi be snapinnusi tennan en pazzulin.

- Palaīdeis tennan en pakkaju - bilīwusi mūti - Tennan ni segēi nikasmu nika wārgan.

 Tīt, adder ast tīt debīkan be tīt retawīngi pawaidinna - bilīwusi ants, kawīda ast snapinnusi antistin - be stesse paggan prawerru tennan tēlktun! 

- Grazzuns malnīkans tu turri mutrīka! - bilīwusi ants sen wūrmin sudrīkan na naggin. Wisāi ast grazzu šlāit stan aīnan, kawīds ni ast izpalluns. Būlai di labban, ik tu mukīlai tennan kitawīdintun.

- Sta ni ast mazīngi, etnīwingi zupūni - bilīwusi mūti-ants. - Arwiskai, tennan ni ast grazzu, adder turri labban sīran be mūka izwanginewīngi plūtwei, tīt pat kāigi kitāi, mazīngi īr biskin walnai.

As gudāi, kāi tennan wīrst izaūgus iz klūmbewingiskwan adder wīrst mazzauwus. Tennan per ilgai lanzēi en pāutu be stesse paggan ni pawaidinna tīt, kāigi turri pawaidīntun.

Skīpai tennan en pazzulin be paglabāwusi tenesmu plāugzdikans.

- Sta ast gi antins - preidāi - be stesse paggan grazzu ni ast per tennan tīt zentlawingi. As mīri, kāi tāns wīrst būwuns spārtan be ainuntkawīdai wīrst enwaldīwuns di.

- Kitāi antistēi ast grazzu! - bilīwusi stāi wurāi. - Erlāikaiti si tīt, kāigi jūs būlitei prēi sin en buttu, adder ik wīrstei aupallusis angures galwan, jūs mazzitei mennei din preipīstun.

Be antistēi erlaikāwusis si tīt, kāigi prēi sin en buttu.

Adder tīt dīgi antis, kāigi gērtas, snapinnušas, spīrušas gurīnan antistin, kawīdan panzdauman izgūbus iz pāutan be bēi tīt klūmbewingi be smeīja si ezze tennan. - Per debīkan - wisāi bilīwusis, adder kalkūns, kawīds gimma sen pentinans be stesse paggan preistatinnuns sebbei, kāi ast kēizeris, pabelzuns kāigi kūgis sen pilnans burrins be wartinnuns si prei antistin be kurrina tīt, kai galwā tenesmu wūrmjau. Gurīnan antistin ni waīdus ka segītun neggi kwēi ēitwei; pawārga tīt spārtai, kāi ast tīt klūmbewingi be ast perglaūdiniskan per pastippan padwarrin.

Tīt bēi en pirman dēinan, adder panzdau bēi tīt wārgais be wārgais. Wisāi perrīpi gurīnan antistin, īr brātis be sestras bēi spārtai nilabbai per tennan.

Katta tin augrābsei, tu dērgewingis mōnsteris! - bilīwusis antistēi.

Adder mūti preidāwusi:

- Būlai walnai, ik tu ēilai sebbei ainuntkwei tāli!

Antis snapinnušas tennan, gertas skēipina, adder mergā, kawīda maitāwusi pippelins, spīrusi tennan sen naggins. Ēnwangan antistin prēipaus bīgus, praskrāidus pra ḑāgan, adder līkutas pippelkas enskrāidušas bajjintan. "Sta stesse paggan, kāi as asma tīt klūmbewingi" - mīriwus antistin be auwīri akkins; adder bīga aīnat tālis, ērgi skrāidus prei debīkan pelkin, kwēi pāustiskas antis buwinnušas. Tennan sindēi stwen pastippan naktin, beggi bēi tīt gurrusi be grāudu.

Ankstaīnai pāustas antis enskrāidušas be pagaūwušas dirītwei na nawwan ginnin.

- Kas tu assei? - prasīwušas, adder antistin wīli si en wissans pāusans be ebkaīlina wissans, tīt kāigi ukapreilāngu mukēi.

- Assei spārtai klūmbewingi! - antis bilīwušas. - Adder sta nūmans ni ast swarewīngi, ērgi tu ni wīrst kwaitīwus pattintun aīnan iz nūsan sēimin.

Gurīnan antistin! Perarwi ni mīri ezze pattiniskwan, tēr kāi dālai dei tenesmu lanzītwei en blāuskei be pūtun biskin undas iz pelkin!

Tennan lanzēi stwen pra pastippans dwāi dēinans; panzdau preiskrāida dwāi pāustazānšas, adder walnai zansīnai, beggi sta bēi wīrikai; niwūrai gimma iz pāutan be stesse paggan bēi tīt rezōlutan.

Nū kīrdis ginni - bilīwusis - assei tīt klūmbewingi, kāi pagaūwa nūmans padīngtwei. Kwāitu skrāistwei sēn mans be bēi wāndrawints pippelis? Stwi en zūrgiskwai, en kitsei pelkin, buwinna delli ebwaidilāntes zānšas, tēr māldas jumprawas, kawīdas mūka bilītwei "gak, lak", mazīngi sen tennans tu wīrst turīwuns deiwūtiskwan, prōpaus swāise klūmbewingiskwan.

"Piff, paff!" - paplatinnus si plakkawingi kīrsa tennans be abbai pāustazānšas krūwušas aulaūwušas en blāuskin, adder undan wūrmjau ezze tenēisan krāujan. "Piff, paff!" - kalsēi etkūmps be pastippas zānsin kāimenis izskrāidušas iz blāuskin, adder panzdau etkūmps šaūsenei bēi kirdītan: medījai lanzēi zūrgi pelkis, ainuntai sindēi na garrin wippins; galīmbs dumīks līki kāigi upjāi sirzdau timrans garrins be kīrsa undan; skalanīkai līzi pa pelkin: plunk! plunk! Drugēi be blāuski lānki si en wissans pāusans. Kāigi gurīnan antistin bēi bajjintan! Wella galwan, kwaitīntei kliptun din pa skreīlin, adder en šismu pat mōmentan stalāi prei tennan spārtai debīks skalanīks, sen izkabīntan inzuwwin be trinewīngi zarawīngins akkins, kāusinuns antistin sen āustin, waidinnuns astrans dāntins be - plunk! prēipaus bīguns, ni gabīntei tennan.

- Ak, dīnkun Dēiwe! - nadwīsi antistin. - Asma tīt klūmbewingi, kāi īr skalanīkai ni kwaitēi min greūztun.

Be panzdau lanzēi pastippai pakawīngi, en kērdan kaddan skrōts swēlpa kīrsa blāuskin, adder šaūsenis kalsēi pas šaūsenin.

Ka tēr wīlai en dēinan šaūsenei pakawīngina si, adder gurīnan pippelistin dabber ilgai ni dīrsina si skatītwei, gēidus dabber delli stūndins be ka tēr panzdau, dirīntei ebzūrgi, izgūbus iz pelkin; bīga, kāigi tēr mukēi ukadīwais, pa laūkan be pa weisijjans, spartā wīdra dūmi, brendu tennan mazēi skatītwei ēmpirsin.

Prei bītan, antistin taūwinus si prei līkutan kalupīkan; bēi di tīt gurīna kalupīka, kāi subba ni waīdusi en kawīdan pāusan krūtwei, tītat ainuntkawīdai stalāi. Wīdra swēlpa kīrsa antistin tīt, kāi īr turēi sīstwei na staggan, kāi stalīlai na naggins; dūmi dei stu spārtais; staddan antistin endirēi, kāi wartelli izraūwa si iz aīnan alūdin be kabēi krēiwai, tīt kai lāngu bēi ensmittintwei en sirdan. Tīt klūmbewingi antistin segīwus. Buwinna stwen wurā genā sen kattan be perīja; katta, kawīdan tenā pabilīwusi per sūnun, mukēi lānktun rīkisnan be suptun spānkstins, adder bēi prawerru glabātun tennan emprīki skebelammans. Perīja turēi īnsans naggins, stesse paggan pabilāi dei tennan per Īnsanagin; tenā lazinna grazzu pāutans be genā milīwusi tennan kāigi swajjan malnīkan. Ankstaīnai endirēi dei swettin antistin, katta pagaūwa mēutwei, adder perīja kadakkintwei.

Ka sta ast? - bilīwusi stāi wurāi be dirīwusi, adder turīwusi kuslin dīran be stesse paggan tenessei perwaidinnā di si, kāi antistin ast instrawa ants, kawīda stwi ast blandāwusi.

- Sta ast labā gaulē! - bilīwusi. - Ik tēr sta ni ast antins, as wīrst turīwusi antis pāutans. Prawerru izbandātun!

Be antistin bēi westan en trejjadēinan izbandāsnan, adder ni ast lazinnus pāutans. Katta bēi buttataws be perīja buttamuti be pastippan kērdan bilīwusis: "Mes be swītan!" beggi mīriwusis, kāi bēi swītas pūsi be ši walna pūsi. Antistin ebgalwāi, kāi ast mazīngi būtwei kitapresniskan, adder perīja ni izstalīwusi stan.

- Mūka tu lazīntun pāutans? - Ni! - Tītat auwerreis āustan!

Adder katta bilīwusi:

- Mūka tu azzautwei, mēutwei be suptun spānkstins? - Ni! - Tītat lāikais swajjan presnan pēr sin, kaddan stāi izpretewīngei bilāi!

Antistin sindēi en lunki be graudēi. Staddan mīriwusi ezze prīskan winnan, ezze saūlai be jutta plakkawingin kwāitan plūtwei en undu. Be ēnwangan ni mazēi etlaikātun si kāi ni bilīlai stan perījai.

- Ka tebbei pergūbi en galwan? Ni turri tu nika per segīsnan be stesse paggan tu wūzaui si. Lazinnais pāutans adder mūrkseis, wīrst di ti pragūbus.

- Adder sta ast tīt enimmumni plūtwei! - bilīwus antistin. - Tīt rikīwiskai ast nirtwei sen galwan en undan be tiktwei izreizan prei dubnan! - Ka sta mazzi būtwei per enimmewingisku! - bilīwusi perīja. - Turri būtwei assei perbartawuns! Prasīs kattan, kawīds ast ukagaūdars pērgims, kawīdan as zinna, anga kwaitīlai tīt plūtwei en undu be nirtwei. Jāu as īr ni bilāi ezze min. Prasīs nūsan wūran zupūnin - ni ast arwiskai nikas gaūdraisin nikāi tenā en pastippasmu swītan. Mīri tu, kāi kwaitīlai plūtwei be nirtwei?

- Jūs ni izprestitei min! - etrāi antistin.

- Nū, ik mes ni izprestimai tin, kas staddan wīrst tin izprettuns? Nikaddan tu ni wīrst būwuns izpretewīngeisin nikāi katta be ezze šissei gennan, jāu as ni bilāi ezze min. Ni wūzaus si tīt, majs malnīks, be dīnkaus Dēiwu per wissan labban ka ast dei tebbei segīwusis. Ni assei gi gaūwuns tappin stubban? Ni gīwa tu sen pērgimans, ezze kawīdans mazzi tu ka nika mukīntun si? Adder tu assei niizstalīminan be waițasnā sen tin ni ast enimmumni. Tu mazzi mennei druwītwei, kāi as kwaitēi tebbei labban, as bilāi tebbei nienimmumnins pawīstins, adder pō stan ast mazīngi pazinātun arwins ginnins. Walnai bāndais lazīntun pāutans be mukinnais si mēutwei adder suptun spānkstins.

- As mīri, kai as wīrst gūbuns en swītan - bilīwus antistin.

- Tītat jaīs - etbilāi perīja.

Be antistin gūbi. Plūwa en undu, nirra en undu, adder niaīns ni wartinnuns na tennan nōdan, beggi bēi tīt klūmbewingi. Assanis pergūbi, lapāi en meḑḑu geltaīnau be wīrta brūnan, wītra gunāi tennans tīt kāi tenēi dāncau en winnu; adder wins bei saltan; upjāi kabēi pilnan ezze kēitarai be snāigu, adder na ḑāgan sindēi wārnis be wakēi "krā, krā" ezze saltu. Jāu ezze mīrisnai bēi mazīngi taikīngi saltwei. Gurīnan antistin dīgi ni jutta si labbai.

Aīnan bītan saūli grazzu auskēnda, adder iz kīrnans izskrāida pastippa kāimeni stēisan āustabawingin, debīkan pippelin; antistin dabber nikwēi ni widāi stawīdans grazzuns pippelins, bēi spānginantei gaīlin be turēi ilgans, lānkewingins winzuns. Tenēi izlaīsi retawīngins gērdans, skīti rikīwiskans, ilgans skreīlins be izskrāidusis iz saltans ebzūrgiskwans en tappins tāutans, prei etwertans jūrins; erlāngi si tīt aūktai, aūktai, kāi gurīnasmu antistin pastāi di ainuntkawīdai retawīngi, tennan willa en undu, iztensīwus prei tennans winzun aūktai en winnu be ēnwangan izlaīdus kalsīwingin be retawīngin gērdan, kawīds ast bajjinuns īr subban antistin.

Ak, tennan ni mazēi izmīrstun ezze šans grazzuns pippelins, ezze deiwūtiskans pippelins be kaddan tenēi ast iznīkusis tenesmu iz akkins, antistin nirra en undu, prei dubnan, adder kaddan izplūwus bēi ikāigi niaumenewīngi. Tennan pastippai ni waīdus, kāigi šai pippelai ast pabilītan neggi kwēi tenēi skrāida, adder milīwus tennans, tīt kāigi niaīnan ni milīwus; ni perwidāi pastippai tenēimans, kāigi tennan mazēi īr supnaūtun, kāi būlai kāigi tenēi; ik ikāi tēr antis mazīlai tennan izstalītun sirzdau sin - gurīnan, klūmbewingi pērgimiks!

Zeimā bēi tīt passalingi! Antistin turēi pastippan kērdan wiltwei en undu, kai sargātun tennan ezze pasallinsnai, adder eraīnan naktin pralī, en kassei plūwa bēi stu anzukaisin, pasallina tīt, kāi lads preskēi lamīntei si; antistin turēi mujātwei sen naggins kāi undan ni stālai, adder ēnwangan gurra, pastippa be preisallina prei laddan.

Ankstāi ankstaīnai pergūbus ainuntkawīds būrs; endirēi antistin, spilla sen kurpins laddan en gabtans be immuns antistin en buttan, prei swajjan gennan. Stwen tenēi baudinna antistin.

Malnīkai kwaitīwusis spīlitun sen tennan, adder antistin mīri, kāi tenēi kwaitēi segītun tenesmu ka nika wārgan. Bijāsnas paggan tennan enpallus en medinītin sen daddan tīt, kāi daddan palaīja si pa stubban, genā krikstijja, lamāi rānkans, adder antistin skrāida en wūmbaran sen anktan, panzdau en kannawin sen miltan iz kawīdan izreizan izskrāidus; kāigi bajjawiskai tennan pawaidinnus! Genā krikstijja be bīga pas tennan sen pazārtin, adder malnīkai gunāi tennan, trīnka be krikstijja - deiwūtiskai wartelli bēi plattu etwertan be antistin izskrāidus sirzdau kīrnans be prīskai krūwusin snāigan - lanzēi stwen pussigiwan.

Adder sta būlai per grāudu ebpeisātun wissan, ezze kasmu gurīnan antistin stīni en kērdan astras zēimas.

Kaddan saūli pagaūwusi etkūmps tapītun, tennan lanzēi en pelkei sirzdau blāuskin; werwiršāi grīmi, bēi grazī wassara.

Niggeistai tennan etwīri per skrāisnan skreīlins, kawīdas šlamēi spārtais nikāi pirzdau be pīdi tennan spārtais nikāi wūrais be pirzdau tenesmu waidāntei, bēi en debīkasmu saddan, kwēi wūbalnis kwitta, kwēi bezzas graznāi izkabēi na ilgans, zallins wippins prei wāngran kanālin undas wīrsawiskwan. Ak, kāigi grazzu stwi bēi, kāigi prīskai, wassariskai! En šismu pat mōmentan antistin endirēi trīns rikīwiskans, gaīlins gūlbins; tenēi izplūwa iz kīrnans be sen skreīlin šlamīsnan plūwa pa undan. Antistin zināi jāu šans grazzuns pērgimans be widāntei tennans jutta retawīngin grūstin.

"As kwaitēi plūtwei prei tennans, prei šans kunnegiskans pippelins! Perarwiskai tenēi wīrst min snappinusis ērgi gallin, ik as, stawīds klūmbewingis, dīrsinlai taūwintun si prei tennans; adder as ni zurgaui ezze stan. Walnan kāi šai grazwāi pippelai min ergalīnlai, nikāi antis min skēiplai, gertas snappinlai, sperlai min mergā maitānti pippelistan adder kāi as stēnlai en zēiman". Antistin bēi zemmai skrāidus na undan be pagaūwa plūtwei prei rikīwiskans gūlbins; tenēi endirēi tennan be sen skreīlin šlamīsnan preiplūwa tenesmu emprīki.

Ergalinnaiti min! - krikstijja naūts pērgims be zemmai laīdusi galwan gēidintei na gallin, adder ka antistin endirēi en skistasmu undan? Swajjan pawīdan, adder kāigi kittan! Ni jau bēi klūmbewingis, kirsnasīws pippelis, adder subban wīrta en gūlbin.

Nika ni ast gūlbei škūdinuns, kāi gimma na padwarrin sirzdau antins, ik gimma iz gūlbis pāutan.

Kāigi tāns juttuns si deiwūtiskan pō šans wissans stēnsnans be dallas emprīkiskans, ka tēr teinū tāns mukēi pawērtintun swajjan deiwūtan. Adder debīkas gūlbis plūwušas zūrgi tennan be paglabāi tennan sen snappans.

En saddan ast pergūbusis delli līkutai malnīkai, kawīdai metti geītin be zirnins en undan, ukamazs ezze tenēimans wekki:

- Nawwa gūlbs ast pergūbusi! - adder kitāi malnīkai wekki ēmpiri sen tennan: - Tīt, nawwa ast tikkusi! - be plakkau sen delnans, be willa ebzūrgi, adder panzdau bīgusis prei swajjans wūraisins be ēmpiri metti en undan geītin be lūgikans, adder wisāi wekki:

- Ši nawwa ast ukagrazzuisin, tīt maldan be grazzu!

Adder wūras gūlbis lānki galwans pirzdau tennan.

Staddan pippelis jutta permaisāsnan tuldīsnas paggan: klippuns galwan pa skreīlin be subs ni waīduns, ka audāst si sen tennan: bēi per deiwūtan, adder ni labatīngi, beggi labban sīr nikwēi ni buwāi labatīngi: mīriwuns ezze stan kāigi perrīpja dei tennan be klausēi, kāigi wisāi teinū bilīwusis, kāi ast ukagrazzuisin ezze wisēimans grazzuns pippelins. Bezāi lānki swajjans wippins kīrsa undas wīrsawiskwan, adder saūli tapijja spārtai be enimmumni; staddan māldas gūlbis skreīlis šlamēi, tenesses laībs winzus erlāngi si be tāns wekkuns iz sīras gillu:

- As ni supnaūwa ezze stawīdan deiwūtan, kaddan as bēi tēr klūmbewingi antistin!