Drūsa (mīstan)
Drūsa (pōl. Truso)- Baltiskas āustes pabilisnā, be stesse kāupiskwas deīktan. Stan bēi zūrgi Wīkslas āustin prei Baltijan, Drūsa bēi ebpeisātan pra Wulfstanan, kawīds preiplūwuns stwen iz Hedeby na Jutlandiskan Pussisalin zūrgi 890 mettan. Ebpeisāsenis stesses pintegan, stesse āustin be stēisan juksenin en Prūsai bēi dītan en Chorografijai stesse Orozin, tulkautan na wuraēngliskan pra kunnegan Alfredan Debban.
Deīktan stesse Drūsan ni bēi zinātan pra ilgan kērdan, prōpaus appus tikriskai preizentli na āustin stesses Wīkslin. Topōgrafiskas kitawīdisnas bēi debīkan, be stesse paggan aupaltun Drūsan ni bēi prastan. Archeolōgs Marek Jagodziński pagaūwa enlaukīsnans prei dēiniskan krāntan stesse azzaran Drūsa, prei kāiman Janów, delli kilōmetrai en pusideinammans ezze Ēlbingu (teinū na teritōriju stesse pints num. 7). Dīnka aupaltan debīkan zināniskan materiālin, be preistalīntins efektans stesses dendrōchronolōgiskan enlaukīsnan, mazēi di bilītun, kāi stwi bēi Drūsa.
Pawīda perwaidinna, kāi Drūsa bēi debīkan kāupiskan āustin sen dizītiskan be kāupiskan wāisin. Tenesse debs bēi kāigi ukamūisesai austēi en Baltijai: Wolin, Hedeby adder Birka. Wāiss bēi tīt ukaswarewīngi deīktan stesse kāupiskwan en Prūsai. Aupalla di stwen pawīstins iz šlaitawīdans deīktans en Eurōpai.
Drūsas swārs pastāi mazzan en X mettasimtu, pra pōlitiskans kitawīdinsnas en Pōlai. Pa kērdan ukaswarewīngin wāisin en regiōnei pastāi Gudānits, gruntintan en āntrai pussin stesse X mettasimtan. Ekzistijja prōjaktan per etteikāsnan stesses wāisin.