Tīt Zaratustra bilāi - ēnturs

Aīnan kāitan dēinan Zaratustra ast enmigguns prei wīgin garrin be ast stīguns prusnan sen rānkans. Staddan āngs ast preiripīwusi be kandusi tennan en winzun, ēr Zaratustra ast krīkstuns ezze gulseņu.
Etimāntei rānkan ezze prusnan tāns dirēi na āngin. Tenā ast staddan pazināwusi Zaratustras akkins, ast auwartinusi si be bandāi nidiwaspārtiskai prēipaus bīgtwei.
Ni, ni – Zaratustra ast gērdawuns – dabber ni assei enimmusi majjan dīnkan. Assei min en kērdan baudinnusi, ilgs pints ast pirzdau min.
- Pints twāise ast jāu īnsan – etrāi āngs sen grūstin. – Majā ēnda ergalinna.
Zaratustra ast smijāwuns.
- Kaddan gi pūkis ast aulaūwuns ezze āngis ēndan? - ast prasīwuns. - Immais swajjan ēndan etwārtai! Ni assei sūit lāiman, kāi mi upperautun di.
Adder staddan āngs etkūmps ebwijāwusi si zūrgi tenesse winzun be etlāizinusi ēizwan.
Kaddan Zaratustra gērdau di kadāi swāimans māldaišamans, tenēi ast prasīwusis:
- Be ka per rīpausenin ēit iz twajjan gērbsenin?
Zaratustra ast etrāwuns tīt:
- Per rāmiskwas augraūstajan bilāi min stāi labāi be stāi tikrōmiskai; majs gērbsenis ast nirāman.
Ik jūs jāu turritei prēisikan, ni etplattiti tenesmu sen labban per wārgan – di beggi gīdinlai. Walnan waidinnaiti, kāi tāns ast jūmans segīwuns ka nika labban. Be walnan sprāgstaiti sen nērtin, nikāi turīlitei gīdintun. Adder kaddan tenēi wīrst wans perklantīwusis, būlai nimīlai staddan tenēimans zignātun. Walnan ēmpiri perklantītun.
Adder kaddan pastāi jūmans debā nitikrōmisku, segēiti pēnkins līkutans en etrāsnai. Dērgewingi ast pawīda šisse, kawīdan jāu subba nitikrōmisku pabrandinna. Assei jāu waīdusis di? Sen ainuntan delintī nitikrōmisku sta ast jāu tikrōmis pūsi.. Šan nitikrōmiskwan turri īmtun nō sin šis, kas mukka di pīstun. Līkuta trinsnā ast spārtais zmūniskan nikāi tenesses nisatausnā. Adder kaddan sūndus ni ast dīgi per perlimījan tikrōmisku be teīsi, staddan as ni izstalāi dīgi jūsans sūndans.
Auktummais ast subsmu segītun nitikrōmiskwan, nikāi līgintun si per swajjan tikran, šlāitewingi turīntei tikrōmin prei swajjan pāusan. Adder pēr stan prawerru būtwei sūit lāiman.
Mennei dergewīngi jūsan saltan tikrōmiskwan; adder iz akkins jusēisan līgintajan dirēi mennei buddels be tenesse saltā gelzā.
Bilāiti, kwei aupaltun tikrōmiskwan, kawīda ast mīlin sen wīdantins akkins?
Aupallaiti māim mīlin, kawīda enimma ni tēr wissans sūndans, adder dīgi wissans wīnans!
Aupallaiti māim tikrōmiskwan, kawīda wissans wīrst etwinūwusi, šlāit līginantins!
Kwaitēitei dīgi stan kirdītun? En šismu, kawīds kwaitēi būtwei tikrōmiskan iz gruntan, īr reddan pastāne etnīstis per zmūnins.
Kāigi mennei būtwei tikrōmiskan iz gruntan! Kāigi mazzi as dātun erainasmu ka tenesse! Sātausei mi stan, kāi as dāma erainasmu ka māise.
Ēnwangan, majāi brātei, kūnteiti si segītun nitikrōmiskwan wisēimans izskīsenikans! Kāigi izskīseniks mazīlai izmīrstun! Kāigi mazīlai tāns etplatītwei!
Ikāigi gillus aps ast izskīseniks. Lāngu enmestun ēn di stabban; adder kaddan tāns wīrst kakinnuns dubnan, bilāiti, kas wīrst kwaitīwuns tennan augaūtun?
Kūnteiti enēizwintun izskīsenikan. Ik adder wīrstei di segīwusis, staddan dīgi ergalinnaiti tennan.

Tīt Zaratustra bilāi.