Pāusas Prēikeni na kekkeras zirnīkan aps

'''Prēikeni na kekkeras zirnīkan''' (''Prindsessen paa Ærten'') - dāniskas gārbikas peisātan ezze [[Hanss Krisțāns Andersens|Hansu Krisțānan Andersenan]] en 8 zallawan 1835 mettas.

===Ēnturs===

Bēi aīnan rēizan aīns princis, kawīds kwaitīwuns pattintun arwiskan prēikenin. Tāns jāwuns en pastippasmu swītan be laukīwuns šan aīnan, adder eraīnan rēizan ka nika tikkusi ainuntkawīda kirslē.

Perarwi sātawušas prēikenis, adder maldūns dirīntei en šans wissans grazzuns jumprawans, ni mazēi audribbintun engnessenin, kāi tennas ni ast simtaprōcentan prēikenis.

Ni aupalāntei šan, kawīdan laukīwuns, etwartinnuns si prei tāwas pillin grāudus be audīrsints.

Ainuntan bītan debīka kāuka pergūbusi. Blīngina be grumēi di, adder sūwa di sen plūjans. Niggeistai ainunts klabbina prei mīstas dwarrins. Kaddan etwīri dei dins, etwaidinna si buwijjamans maldā mergā. Kāigi tenā pawaidinnusi! Undan iztekka tenessei iz skebbelins be suknin, lijja en kurpins be slikka iz tenēisan wangans ūnzai. Sta ni bēi wangā sen surprīzins per šan bītan - stāi niwaistāi ebgalwāi, kāi ast ši ainā, laukitā prēikeni!

- Nū, wīrstmai endrūwinusis si izreizan - pamīri kunnegini-mūti, adder kalsīwingi ni bilīwusi nika.

Tenā gūbi ēmpiri sen šlūzenikins, kawīdas ast pagattawinušas māigastuban per niggeistan wāisin, auimmusi iz laztan pastippan mūwan be sadinnusi na dēlins aīnan līkutan kekkeras zirnīkan. Panzdau ebstīgi tennan sen dwiddesimtin pabālzans  be dabber lazinnusi na tennans dwāinadesimt pūkiskans plāugzdinins, aīnan na āntran.

Laztā per prēikenin bei gattawan.

Ankstaīnai kunnegini prasīwusi tennan, adder tenā labbai migēi.

Ak, grāudu adder ni - etrāwusi prēikeni - pra pastippan naktin as ni permerki akkin. As lanzēi nō ka nika drūktan, pastippan kērmenin ast sen mīlinins be gulla.

Tīt pazinna dei, kai sta ast izarwi arwi prēikeni. Beggi tēr arwi prēikeni mazīlai jāustun kekkeras zirnīkan pra dwiddesimtin pabālzan be dwāinadesimt pūkiskans plāugzdinins!

Deiwūtiskas princis pattinuns tennan, adder kekkeras zirnīkan dīja dei en wālstis muzējan be mazīngi tennan ast stwen ērgi šandēinan (ik ni ast ainuntkwei prapallus).

Tīt wanginna si arwi istōrija ezze arwin prēikenin.