Tū redigijja Sallawis (garbīkas)

'''Sallawis''' - ast dāniskas gārbikas peisātan ezze [[Hanss Krisțāns Andersens|Hansu Krisțānan Andersenan]] be pirman rēizan perlazīntan en 1843 mettan.

===Ēnturs===

	Tūlin metāi pragūbi ezze audāseņu, ezze kawīdan as kwaitēi jūmans gērbtun, tītat kīrditi, ērgi zmūnei ni wīrst pastippai ezze stan izmīrsusis.
	Mazīngi jūs waīditei, kāi kīniskas kēizeris ast kīns, kāigi tenesse dwarrinai be empīriniskai wisāi šisses tāutas buwijjai.
	Tītat šisse kēizeŗas rūms ast aīns iz ukagrazzuisins zēistans en pastippasmu swītan - debīks, rikīwiskas be iz ukalāilin pōrcelanan, tīt deīgawan be delikātan, kāi ēst ni ast mazīngi tennan kāusintun.
	Ebzūrgi rūmas plattina si sads, pilns stēisan ukarettaisin, ukagrazzuisin kwēitin. Prēi tennans ast preiwanzātan līkutai kālsikai iz stiklin be sirablin, kawīdas kālsa, kaddan ainunts praēit, stesse paggan, kai niaīns ni izmīrslai dirītwei na tennans.
	Tīt gaūdrai wissan bēi patikātan en kīniskas kēizeŗas saddu. Adder sads plattina si spārtai tāli be subs saddeniks ni waīduns perarwi, kwēi tāns wanginna si. Beggi perarwi tāns pastippan ni wanginnuns si, adder senlaīja si sen debīkan meddin, kwēi bēi tūlin debīkai azarāi be wūrai gaŗāi, kawīds kakinna ērgi jūŗas krāntans. Jūris bēi galīmban be spārtai gillu - prēi subban krāntan mazēi preiplūtwei debīkai laiwāi be stātwei pa wippjamans stēisan gigāntiskan, prawūran garrin.
	Na aīnan ezze tenēimans, na zemman zallin wipīkan, sallawis ast wijjuns ligzdan be grīmi eraīnan naktin tīt āustabawingi, kāi gurīnai zukenīkai, kawīdai izplūwa na jūrin kai peršlūzilai, zemmai laīdi tīnklins be sindēi dīkai, enklausītan en waīdilawīngin grīman.
	- Dēiwe, kāigi sta ast grazzu, Dēiwe, kāigi tāns gremmja! - tenēi āntrina endāusintan, etwartināntei si etkūmps prei dīlin.
	Adder en ripīntin naktin tenēi āntrina etkūmps:
	- Dēiwe, kāigi sta ast grazzu! - Dēiwe, kāigi tāns gremmja!
	Iz pastippan swītan perjāwusis en Kīnan pintegaūnikai, kāi widālai kēizeŗas galwasmistan, rikīwiskan rūman be stebbulin saddan, adder kas ezze tenēimans tēr kirdēi sallawin, āntrina šlāit dwigubāsnan:
	- Sta ast ukagrazzuisin iz wissan.
	Etwartināntei si en taweīnan, pintegaūnikai gērba ezze kēizerin, tenesse rūman be saddan, ezze wissans stebeklins, na kawīdans dirēi. Zinānikai peisāi ezze stan tūlin lāiskans, en kawīdamans tenēi enstebbulau grazzuns pawīstins, "adder sallawis ast ukagrazzuisin iz wissan" - garantijja aīns pas āntran. Pōetai teīki īr grazzuns wērsans, pagirīntins meḑḑas gremtajan.
	Laiskāi paplatinna si en pastippan swītan, adder ainuntai ezze tenēimans pintegaūwa en subbas kēizeŗas rānkans. Tāns sīda en ausaīnai krōnin na tēmpran krīslin be skaitāi, līnkantei galwan sātwinsnas paggan, skaitāntei ezze swajjan rūman be saddan.
	"Adder sallawis ast ukagrazzuisin iz wissan" - āntrina si na eraīnan pāusan.
	- Ka sta zentli? Kēizeris prasīwuns austabbints. - Sallawis? Ka sta ast? En majasmu saddan ast ka nika tīt grazzu, kāi wisāi pintegaūnikai endāusina si, adder as erzināi stan iz lāiskans?
	Be izreizan wakīwuns šamberlāinan.
	Sta bēi tīt labatīngis algenīks, kāi ik ainunts iz zemmai stalīntins algenīkans dīrsina si namestun ainuntkawīdan prasīsenin, tāns etrāi tēr "Hm!", ka īr kīniskai nika ni zentli.
	As erzināi iz lāiskans - bilāi kēizeris - kāi en majasmu saddan buwinna sallawis, stebbuls pippelis, ukagrazzuisis iz wissan, ka ast en majai wālstin. Kasse paggan ērgi teinū as nika ezze tennan ni waīda?
	- As dīgi ni kirdēi ezze tennan - etrāi lāustingi šamberlāins - ni pastāi ērgi teinū preistatīntan.
	- Tītat as palaipinna, kāi šandēinan pastālai preistatīntan - bilīwuns mōnarchs. - Pastippan swītan waīda ezze māntan, adder as aīns nika ezze tennan ni waīda!
	- Pirman rēizan as kīrdi ezze stan - āntrina šamberlāins - adder as wīrst stenguns si aupaltun tennan izreizan.
	Aupaltun! Kwēi tennan laukītun? Gurīns šamberlāins bigāi šlāit etdwisin pa wissan stubbans, trappans, kurridarans, ūnzai be zemmai, prasijja wissans, adder niaīns ni mukēi tenesmu etrātwei: nikas en rūmu nika ni kirdēi ezze sallawin be nikas nika ezze tennan ni waīda.
	Tītat tāns etwartinna si prei kēizerin, garantīntei, kāi sallawis ni ast na swītan, be turri būtwei, kāi en lāisku peisāi dei nitikran.
	- Jūse Kēizeŗas Majastāti ni druwīsei en stan, ka peisāi dei en laiskammans - bilīwuns endrūwintan - wissan sta ast gārbikas šlāit preslin be wārginģai redāi.
	- Adder gi šan lāiskan ast mennei tenginnuns subs Dalaj-Lama - wekkuns kēizeris - tītat stwi ni ast gārbikas, adder reddan ni mazzi būtwei. As kwaitēi kirdītun sallawin. 	As palaipinna, kāi šandēinan tāns pastālai mennei preistatīntan. As wīrst ebdajāwuns tennan sen ukaaūktan etnīstin. Adder ik ni wīrstei tennan aupallusis, pastips dwars wīrst būwuns līgintan per brūzgausnan sen bambun.
	- Tsing-pe - etrāi šamberlāins be pagaūwa ezze pagaūseņu prabigātwei kurridarans, stubbans, galarījans be trappans. Pas tennan bīgusi pastippa rindā stēisan dwarrinan be algenīkan, beggi ni aīns ni turēi kwāitan per brūzgausnan sen bambun.
	Adder tenēi nika ni mazēi erzinātun ezze sallawin, kawīdan zmūnina pastippan swītan. En kēizeŗas rūmu ni waīda dei ezze tenesse būsnan.
	Ēnwangan tenēi prasijja ezze tennan gurīnan mergīkan, mūwenikinin prei kēizeŗas kukūrin, kawīdan prēipalingi tenēi ebtikka na pintin.
	- Kāigi as mazīlai ni zinātun sallawin? - Tenā etrāi. - Kāigi as mazīlai ni zinātun tenesse gremsnan! As kīrdi stan eraīnan dēinan, kaddan as pīda en bītan likkins iz kukārin per enwārgusin mūtin. As sīnda staddan en meḑḑu, adder prei jūŗas krāntan be klausēi, klausēi tennan bewangiskai be as ni mazzi etēitwei, beggi tīt mennei enimmumni be saldai, kāi assaras tēnka mennei en akkins, ikāigi mūti min buccaulai. 
	- Klausēis - autēnsuns šamberlāins - tu wīrst gaūwusi dwarras kukūrinis deīktan be as wīrst ōrganiziwuns tebbei tikrōmin kāi dirīlai pa prālin, kaddan kēizeris pusideinaūja, ik tu wīrst mans weddusi prei sallawin, kas turri būtwei šandēinan preistatīntan prei dwarran.
Be izreizan wisāi gūbi pas mergīkan en meddin, kwei sallawis grīmi.
	Gūbi jau tāli, kaddan klanti maūwa.
	Ōhō! - wekki tuldewīngi šamberlāins - kīrditei tennan? Ka per warrin en līkutasmu pippelin. Izarwi, sta ast stebbulin! Adder perwaidinna di mennei, kāi as jāu kadāi kirdēi tennan?
	- Sta klanti maūne - bilāi līkuta mūwenikini - ērgi deīktan kwēi sallawis buwinna ast dabber spārtai tāli.
	Dīwan en taūwai pelkin krupeīlis spekēkina.
	Ak, kāigi grazzu! - wekkuns dwarras kapelmāisteris - Pastippai kāigi stiklaīnas kālsikai!
	- Sta ast krupeīlis - bilāi etkūmps mergīka - adder teinū druwīminai wīrstmai kirdīwusis tennan niilgai.
Izarwi, niilgai sallawjas grīma pastāi kirdītan.
	- Sta ast tāns! - wekki mergīka tuldewīngi - Ak, klausēiti, klausēiti! Dirēiti, tāns sīnda na wipīkan!
	Be waidinna sīwan pippelkan sirzdau zallins lappans.
	Ast di mazīngi? - prasijja austebbuns šamberlāins - As ni gudālai, kāi sallawis mazīlai turītun tīt rindewīngin izwinaīnan. Adder mazīngi tāns ast aumettuns bārwins seīlasnas paggan, wīdantei telli auktummans zmūnins.
	- Salawīks! - wekki tuldewīngi mergīka - Nūss kēizeris kwaitēi, kai tu tenesmu gremlai.
	- Sen ukamūisesan kwāitan - etrāwuns sallawis be grīmi, kāigi mukēi ukawalnai.
	Ikāigi kālsikai, ikāigi sirablas! - āntrinuns šamberlāins - Spārtai grazzu! Dirēiti tēr, kāigi tenesmu gurklē dilāi! As prawīdaui, kāi na dwarran tāns wīrst turīwuns debīkan izpalsnan. 
	- Turri as dabber gremtun per kēizerin? - prasijja sallawis, endrūwints, kāi subs mōnarchs klausēi tenesse grīman.
	- Ukamīls sallawis - aubilāi šamberlāins - majā teīsi ast perwūkautun tin šandēinan en bītan en rūman, kāi tu mazīlai sen stebbulin gremsnan endāusintun subban mōnarchan.
	- Ukaspārts mennei padīnga gremtun en meḑḑu - etrāi sallawis - adder ik kēizeris izkīnina, as wīrst statinnuns si en bītan en rūmu.
	En galwas pōrcelanas stubbai pagattawina dei rikīwiskan pūjan - zeidāi, natallis be tāls blīngina ezze swaikstammans,en kurridaramans statinna dei ukagrazzuisins kwēitins, adder kālsikai kalsēi tīt kalsīwingiskai, kāi brendu bēi pawīrpai waițātwei.
	Na stubbas sirdan, pirzdau kēizeŗas trōnan, dīja dei ausaīnan lagzdīkan per sallawin. Pastips dwars senrīnka si, mandarīnai en lankinammans rūkans, zupūnis en ballas tualattimans, īr līkutai mūwenikinei, kawīda aupalla sallawin dāi dei dirītwei pra spīltan, beggi pastāi erbilītan teinū: Tenesse Kēizeŗas Majastātis Dwarras Kukūrini.
	Wisāi dirēi na pippelkan sen sīwans plāugzdikans, sīndantin na ausaīnan lagzdīkan, subs mōnarchs līnka galwan etnīwingiskai.
	Staddan sallawis pagaūwa gremtun. Grīmuns tīt stebbulai, kāi assaras blīngina en kīniskas kēizeŗas akimmans be tekka līnai pa laīknans. Wīdantei stan, sallawis grīmi dabber grazzuis, adder tenesse tāri spruwwa sīrans be papilnina tennans sen wesseliskwan. Wāldnikas prusna tuldijja be ebdajāi sallawin sen swajjan ausaīnan pantuplin, kawīdan pippelis ezteinū mazēi pūdatun na winzun.
	Adder sallawis dīnkau per tīt rikīwiskan dājan.
	Asma prāizintan sātwinai - bilāi - as widāi assarans en twajāmans akkins, ak mōnarchs, sta ast ukawertīngeisis prāizus per gremtajan. Assaras turri swajjan kaīnan be nijāukun wērtibin, subs Dēiws wīda, kāi deīgiskai  as pastāi prāizintan.
Be etkūmps pagaūwa gremtun, dabber grazzuis.
	Pastips dwars bēi endāusintan. Zupūnis en ballas rūkans paimmi undan en āustan be kalsīwingiskai perlaīja en gurklīmans, ka turēi etwaidīntun sallawjas tārin, mandarīnai be dwarrinai līnkai galwans, īr šlūzenikijja izbilāi sātwinsnan, adder stan zentli spārtai tūlin, beggi sātwintun tennan - kāigi waīstan - ast brenduis nikāi ukaaūktaisins algenīkans.
Aubilīntei - gremtajas izpalsenis bēi nipalīgiminan.
	Tāns turēi ezteinū paliktwei na kēizeŗas dwarran be buwīntwei en rūmu, en ausaīnai klatkan, iz kawīdan bēi tenesmu preiwērptan izskrāistwei per neikaūsnan dwāi rēizans en dēinan be aīnan rēizan en naktin. Tāns gaūwa dwāinadesimt šlūzenikans, adder eraīns preiwanzāi tenesmu prei naggin sīlkas wīrbin, kāi būlai tenesmu lānguis skrāistwei.
	En pastippasmu mīstan ni waițāi dei ezze nika kittan, tēr ezze stebbulin pippelin be ik dwāi zmūnei ebtikka si na gatwin, staddan en ebkaīlinsnas deīktu, aīns izreizan bilīwuns "salla", adder āntars wanginnuns "wis". Dwāinadesimt kaupikai pabilīwusis swajjans malnīkans sen sallawjas emnin, prōpaus niaīns ezze šēimans "Sallawins" ni turēi en gūrklai sallawjas stangsnan.
	Aīnan dēinan kēizeris gaūwa pakkan sen nōpeisāsenin "Sallawis".
	Izpretīngi nawwa teikāli ezze nūsan gremtajan - bilāi sātwins.
	Adder en pakku ni bēi lāiskas, adder kunstiskas sallawis, patikāts spārtai retawīngi be grazzu, adder pastips ebsupts sen dēmantins, rubīnans be safīrans.
Kaddan preiwērbi dei šan mašīnikan, kunstiskas sallawis izreizan grīmi ilgan be kōmplicitan grīman. Prēi stan rikīwiskai banginna sen staggan, kawīds blīngina sen tēmpran stabban blīngan. Na winzun turēi sīlkas līntin sen nōpeisāsenin: "Ka ast Dalaj-Lamas sallawis en palīginsnai sen kīniskas kēizeŗas sallawin!"
Stebbuls! Rikīwiskas! - wekki dwarrinai be šis kas tengi kēizeŗu pakkan, gaūwa izreizan tītelin "Tenesse Kēizeŗas Majastātis Dwarras Obersallawins".
	- Adder teinū gremsei tenēi ēmpiri - palaipinna kēizeris - sta wīrst būwuns rikīwiskas duets. 
	Preiwērbi dei kunstiskan sallawin be tenēi turēi gremtun ēmpiri, adder duets ni izpalla, beggi kunstiskas sallawis grīmi pa enzēistasmu ritman, adder meddiskas gremtajs iz sīran be endāusinsnan.
	- Šis ni ast winūtan - pretta dwarras kapelmāisteris, waidināntei na kunstiskan pippelin - izwanginewīngi laikāi si prei taktan, ikāigi tāns mukīnlai si en majjai skūlin.
	- Preiwērbi tītat tennan per subbawingin gremsnan be turēi ni mazzan izpalsnan nikāi arwiskas sallawis, adder sen tēmprans be blīnginantins rūkans spārtais wissan endāusina.
Aīnan stan subban grīman grīmi trīsdesimts trīns rēizans be pastippai ni gurra. Wisāi klausēi tennan sen debīkan eninteressinsnan, adder ni zināi dabber melōdijan iz minīsnan, beggi bēi spārtai kōmplicitan. Kwaitēi dei preiwērbtun trīsdesimts ketwirtan rēizan, adder kēizeris palaipinna, kāi teinū gremlai gīws sallawis.
	 ... Adder kwēi tāns prapalla? ...
	Niwidāts izskrāida pra lāngstan be prēipaus bīga en swajjan zallin meddin.
	- Ka sta ast? - prasijja kēizeris nisātwints.
	- Ka sta ast? - āntrina izrēizan dwarrinai be pagaūwa šiššelitwei sen kalsīwingiskan ernertīsnan, preimetāntei sallawju nidīnkawingiskwan.
	- Deiwūtiskai, walns pippelis nūmans palikka - pretta ēnwangan.
	Palaipinna dei preiwērbtun tennan trīsdesimts ketwirtan rēizan be etkūmps klausēi dei sen stūrnawan kōncentrisnan izwanginewīngin be brendun grīman, kawīdan dabber niaīns ni mukēi mukīntun si.
	Kapelmēisteris ni mukēi aupaltun sūit wīrdans, kāi girlai māisteriskan gremtajan, kawīds en tenesse presnāmans bēi wērtan bewangiskai tuls ezze arwismu sallawin, ni tēr grazwas be tēmpras izwinaīnas paggan, adder galwas māisteriskas ēntrewingis mekānismas paggan.
	- Madli rikijjai pawērtinaiti subbawingi šan šlaitīntan: - bilīwuns - sen arwin sallawin nikaddan ni waīda dei, ka wīrst grīmuns? Ast dei nō tenesse etnīstin. Adder en kunstiskasmu wissan ast ainatīngi, eīsku dātan be waīstan. Mazīngi etwertun tennan, widātun cilīnderins be stiftīkans, izprestun, iskwēndau tāri tīnka be kāigi. 
	Be wisāi preitarēi, adder Dwarrai Obersallawins gaūwa preiwērpsenin waidīntun pippelin amžu en ukataūwaisins swintīkans
Wisāi klausēi tennan sen debīkan endāusinsnan be erlāngusis unzai waidinapīrstin wekīntei: "O"! - panzdau augūbi, līnkantei galwans.
	Tēr gurīnai zukkaunikai, kawīdai kirdēi ainuntkaddan sallawjas grīman, mirēi kitawīdai.
	 - Grazzu tāns gremmja - bilāi, adder ka nika tenesmu nisātaui. Adder ka? Mes subāi ni waīdimai.
	Sallawin pastāi līgintan per izgūnsnan iz kīniskan wālstin.
	Kunstiskan pippelin sadinna dei na sīlkas balzinin prei kēizeŗas lāztas galwadelīkan. Ebzūrgina tennan wissas tēmpriskwas be dājas, kawīdans bēi gaūwuns per grīmans; dāi dei dīgi tītelin stesse "Tenesse Kēizeŗas Majastātis Debban Gremtajan" be pirman deīktan prei kēizerin prei stallin, prei kāiran pāusan, kāigi prei sīras pāusan, tīt prei šan swarewīngeisin, beggi dīgi kīniskas kēizeris turri sīran prei kāiran pāusan.
	Dwarras Kapelmāisteris bēi peisāwuns ezze tennan disertaciōnin, spārtai zināniskan be pilnan stēisan nijāukun wīrdan en dwiddesimts pēnkins tōmamans; eraīns dīgi kāupi tennan be girri, kāi ni mirīlai dei ezze tennan, kāi tāns ast ainunts nimukīnts, kawīds stawīdans pawīstins ni izpresta.
	Tīt pragūbi pastippan mettan, Ni tēr dwars be kēizeris, adder wisāi galwasmistas buwijjai zināi jāu sallawjas grīman iz minīsnan, klausēi dēi tennan gi sen aīnat mūisesan enimmumniskwan, beggi eraīns mazēi teinū āntrintun prei gremtajan. Grīmi dēi wisāi: thiu, thiu, thiu! glu, glu, glu! Grīmi gatwinai, grīmi dīgi subs mōnarchs.
	Adder aīnan bītan, kaddan kēizeris, lānzantei na lāztan, klausēi zinātan grīman, niggeistai ka nika en pippelu dunēi, trīnka, wīli, nurgēi be trrr! - tusēi. 
	Mōnarchs izsāka iz lāztan be izrēizan tenginnuns per dwarras doktōran. Ka gi mazēi pagalbtwei stwi doktōrs? Gūbi dēi prei zēgerinikan be šis endirīntei spārtai nōdewingi mašīnikan be līnkantei galwan en wissans pāusans papretta, kāi pippelin dabber mazīngi reparītun, adder ainakīsmingiskai pawakēi, kāi prawerru tennan spārtai taupītun, beggi wērbikai ast autirīnusis si, adder ni ast mazīngi tennans mainātun.   
	Auminisnā! Tēr aīnan rēizan en mettan bēi mazīngi preiwērbtun sallawin, adder dīgi šī bandasnā bēi per tennan wargīngi. Tītat pa eraīnan grīman dwarras kapelmāisteris ebtirīnuns prakāitawusin kāktan be bilīwuns waițāsnan, spārtai grazzun be ukagrazzuisin wīrdan pilnan, en kawīdsei garantīwuns, kāi kunstiskan pippelas gremsnā ast izwanginewīngeisin nikāi šlaitkaddan. 
Be etkūmps pēnkei metāi pragūbi, kaddan niggeistai na tāutan krūwa arwi nideiwūtisku: kēizeris enwārga spārtai be doktōrai endrūwina, kāi ni ast per tennan izrankisnā. Etrīnka dei weldūnan be tēr amzin, entikriskai mīlīnti swajjan mōnarchan, senrīnka si prei rūman, prasīntei ezze tenesse kailūstiskwan.
	 - Hm! - etrāi tenesmu tēr šamberlāins be drībi galwan zentlawingi.  
	Kēizeris lanzēi na rikīwiskan laztan, bāls be salts. Pastips dwars laikāi tennan per aulaūwusin, tītat bei pāustai en šismu rūmas delīkan; algenīkai be mandarīnai spīja prei nawwan wāldnikan, beggi teinū tāns mazēi audātun etnīstins be māntans. Ezze šlūzenikijjai dīgi nikas ni bēi prei tennan, šlūzenikai be šlūzenikis, tērpawintei kīsmingiskan bekunnegiskwan, segīwusis prēi sin rikīwiskan pūjan be waițāi ezze wissan, ka waīda be ezze ni waīda pastippai. 
	En debīkamans zālins be kurridaramans lazinna dei tepīkans, kāi zangāi ni būlai kirdītan, tītat en rūmu bēi tūsnan, ni mēnstan sen niaīnan šlamīsnan. 
	Adder kēizeris ni aulaūwa, prōpaus lanzēi šlāit warrins na pūrpurnan laztan, ebstegts sen brendun drīmbin ezze pūrpurnasmu aksamittan sen ausaīnans ratīnzins. Pra etwertan lāngstan enpalla en stubban lāukan mīnikas blīngan be erswāikstina zālin, kēizeras wīdan be kunstiskan pippelin na sīlkiskan balzinin prei laztāgalwin.    
	Mōnarchas kreklin erlāngina si ēst, sen kuslin be lāilinantin dwesnan, beggi tāns jutta nō tennan gnettan, ikāigi debīkan stabban. Etwīri akkins, kāi widālai, ka tennan tīt spārtai gnetta be widāi - gallin. Na tenesse sīran sindēi kaūlingi, en tenesse subse krōnei, sen tenesse kalabijjan en rānkai, sen karengun en āntrai. 	Wissans kēizeriskans māntans gals ast tenesmu etimmuns, teinū wīrst etimmuns gīwan.
	Adder iz per brendun, aksamitas drīmbin, waidinna si retawīngjai wīdai: aināi smijāwingjai be lāukai, kitāi mōnsteriskai, bajjawiskai. Sta bēi labāi be wargāi kēizeŗas segīsenei, kawīdai etwartinna si prei tennan en gallas stūndei, kai ēmpiri sen tennan palaīstun šan swītan.
	Aīns pas āntran waīdina si iz per pirsidrīmbins be bilāi tenesmu.
	 - Pamenna tu ezze stan? - Adder ezze stan, pamenna tu? - Adder šan stūndin ni assei izmīrsuns? Adder stan? Adder stan?
	Be bliāi tīt tūlin, kāi enwārgulu galliskas prakāitan stīgi kaktan be tāns ni waīduns ka segītun, kai tūls tennans ni kirdīlai.
	 - Nikwēigi en gīwatai as tīt ni stīni! - tāns šiššelai. - As ni kwaitēi stan kirdītun! Muzīkin! Muzīkin! Dēlbjaiti en debīkan kīniskan trumbelin, kāi as ni kirdīlai tenēisan tārins! As ni kwaitēi kirdītun, ka tenēi bilāi!
	Adder wīdai iz per pirsidrīmbin smeīja si be bilāi aīnat, aīnat, šlāit wāngan, adder gals, kāigi kīns, aīnat līnkai sen galwan en ausaīnai krōnin. 
	 - Muzīkin! muzīkin! - āntrinuns gurruns mōnarchs. - Sallawis majs ausaīns, tu mennei gremmjais! As tin tīt milāi! As tin ebsuppi sen dājans, swāise subse pantuplin asma kabinnuns na twajjan winzun! Gremmjais mennei teinū! Ni wīrst tu mennei grimmuns?...
	Adder pipelis tusēi. Ni bēi niaīns, kas tennan preiwērblai, tītan bedūšas mašīnika ni mazēi gremtun.
	Be ter gals dirēi na tennan sen pāustans dulzins en kērpetei, adder ebzūrgi bēi bajjawiskai be lāilinantei tūsnai.
 Niggeistai na zallin wippin per lāngstan āustabawingi gremsnā pagaūwa si: sta arwis sallawis!
	Tāns erzināwuns ezze kēizeŗas enwārgsenin be izreizan preiskrāiduns prei tennan sen pakīwinantin nadrūwisnas grīman. Be grīmi tīt āustabawingi, kai bajjawiskas māris bālau be iznīka, adder kraūja aīnat dīwais skrijja en aulaūjantis sturnāmans wanginnimans. Īr subs gals wanginna līnkautwei be enklausīts, āntrina tēr:
	- Ak, gremmjais dabber, gremmjais!
	Adder wīrst tu mennei etdāwuns kēizeŗas kalabijjan? - Kēizeŗas karēngun? - Wīrst tu etdāwuns ausaīnan krōnin? - prasijja sallawis.
	Be gals etdāi grābtans māntans, aīns pas āntran, per āustabawingins grīmans.
	Adder sallawis grimmuns tālis, aīnat grazzuis be grazzuis. Grimmi ezze naktin be kapūrnas tusnan, kwēi gāilas rōzis kwista na priskin kappan, kwēi smārdi palaīja swaigināntin smārdan, adder zmūnin assaran rāsa krūja na zālin be kwēitins.
	Be, augrābts sen ilgisnan prei taweīnas tāutan, gals audūmi si en lāukan kupsīnan be, lāngus kāigi uppin, izskrāida pra etwertan lāngstan.
	 - Ak, dīnkun tebbei! - bilāi kēizeris. - Dīnkun tebbei denginniskas pippelis! As asma tin erzināwuns. As izgunni tin iz majjan kunnegistan, adder tu assei sklajjuns mōnsteriskans mārans, kawīdas min lāilina be subban gallin tu izraūwa ezze majjai lāztan. Kāigi as mazzi tin prāizintun?
	As jau asma prāizintan - etrāi sallawis. - As widāi assarans en twajāmans akkins, kaddan pirman rēizan as grimmi pēr tin be jau nikaddan en gīwatai as ni wīrst stan izmīrsuns. Assara - sta ast ukawertīwingaisis auktummastabs, aūktaisin prāizun nikas tenesmu dātun ni mazzi.
	- Adder teinū miggais; maigā etwārtai wartinna kailūstiskwan; as wīrst suppinuns tin prei māigan sen grīman.
	Be enwārguns kēizeris enmigga, māigintan sen ebwaidilāntin, sāldan melōdijan grīmas, kawīda tekka iz sīran.
	Saūlis swāikstastrīlas enpalla pra lāngstan en pōrcelanas zālin be kēizeris budda gīws be kailūsts.
	Ni bei nikas prei tennan: šlūzenikijja mirēi, kāi tenesmu ni prawerīngi tenēisan šluzisnā, - tēr na wippin per lāngstan grīmi sallawis, arwis ginni, kawīds ni laukīwuns prāizun be zmūnin, adder mukēi milītun padāwingi.
	Palīnkais sen min per wisaddan - gērdau tenesmu kēizeris - tu wīŗst grīmuns tēr staddan, kaddan subs wīrst kwaitīwuns, adder kunstiskan pippelin as wīrst spilluns en malkans delīkans.
	Palaīdeis tennan - madlijja gremtaja - gi tāns šlūziwuns tebbei padāwingi, kelli mazēi. As ni mūka buwīntwei en rūmu, ni mazzi stwi wītun līgzdan; mennei prawerru pawīrpingiskwan be meddin. As asma Dēiwas gremtajs be ni mazzi en šismu swītan būtwei nikasse sklāwi neggi šlūzitwei īr ukaspārtaišasmu be ukawalnan iz mōnarchans. As mazzi gi būtwei tenesse ginni. Eraīnan bītan as wīrst sīduns na wippin prei twajjan lāngstan be wīrst tebbei grīmuns, kai tin wesselintun be pakawīngintun; majā grīma wīrst baudinnusi en wajasmu sīran arwiskwas ginnins, auktummans jūsnans, kawīdans twajāi dwarrinai kunstiskai māigina. As wīrst tebbei grīmuns ezze wissan, ka grāudu, ezze stēnintins be nideiwūtiskans, ezze wargīwusimans be izmīrstans, ezze wissan ka tenēi kliptina ezze ti. Līkuta pippelka skrāida wiskwēi, wīda wissan, - zinna gurīnans kalupīkans stēisan zukkaunikai prei jūrin be brendu dīlantins būrans, kawīdans tu, rikīs nikwēigi ni widāi. As nikāi twajjan krōnin spārtais wērtina twajjan sīran be tenesmu as wīrst waițāwuns en māimans grīmans. Pataukinnais mennei ter aīnan.
	- Wissan ka tu wīrst enlaipinnuns! - etrāi, etskīntei, kēizeris - be kāigi klāntas zentlin ausaīnan kalabijjan preiglābi prei sīran. Etkūmps pawaidinna rikīwiskai en lāimamans kēizeriskans rūkans, kawīdan subs šandēinan māuki, klausīntei pippelas-ginnis tārin.
	- Ni bilāis nikasmu ezze stan - preidāi sallawis - kai ast līkuta pippelka, kawīda tēr tebbei gremja arwiskwas be mīlas grīmans. Druwīs mennei: tīt wīrst di būwus walnan.
	Be sallawis etskrāida.
En kēizeŗas stubban engūbi dwarrinai be slūzenikista, algenīkai be mandarīnai, wisāi preigūbi zignātun aulaūwusin mōnarchan, panzdaman rēizan dirītwei na tenesse prusnan.
	Niggeistai tenēi stāi austabbintai: kēizeris bei ebwilktan, sen kalabijjan en krōnei, wesselingis, gīws be kailūsts.
	Kaīls jūmans - pratāra preilāngu.