Wurmiplāugzda
Wurmiplāugzda (Scardinius erythrophthalmus) - zukkas pērgimi iz sēimin stēisan zarātiskan. Enbūwina pastippan Eurōpan šlāit zēimiskan Skandināwijan, Šutlandan, Krimman be Ibēriskan Pusisallin.
Sirdawisku[redigīs]
Gīwa en līnai tenkantimmans, spārtai paāugtans appins be azzarans sen šlammiskan dubnan. Gīwa en līkutamans kāimenins, taūwu prei wīrsawiskwan en pakawīngimans, be tappimans teīnins.
Pērgimis glaubāi[redigīs]
Kakinna 25-30 cm, rettai kīrsa 40 cm be massin ērgi 1 kg. Kērmens grawwiskai plassintan. Austā wartīntan ūnzai. Rīkisnas plūtwan praskajjintan prei staggan, tenesse pagaūsenis ast per wīderas plūtwan pagaūsenin (prei palīgin brūnsin rīkisnas plūtwan pagaūne si kīrsa wīderas plūtwan pagaūsenin). Rīkisna ast galimbazallin, grawwai sirablawīngi gaīlin sen ausaīnan tōnan. Rīkisnas be kreklas plutwāi sīwan sen wūrmin tōnan, kitāi laukawūrmin. Aks ōranzinan adder geltaīnan.
Maitasnā[redigīs]
Šai maldāi īst planktōnan, pa 7cm ilgas pratrepsnan pagaūne īstun en galwas delīku undas aūgmenins. Īst dīgi wūdans be bewērbuliskans zwīrins. Debīkai wurmiplāugzdas īst dīgi līkutans zukīkans be mazzi būtwei gabtan sen lāngun spinningan.
Tūlininsna[redigīs]
Tūlninsna en sakkin-zallawan adder sīmenin ik ānkstais undas ni ast sūit tappin. Gennika lazinna ērgi 100 000 pāutans sen diāmetrin 1.5 mm. Mazzi giwītwei ērgi 20 mettans, sīrpsta sirzdau āntran be ketwirtan gīwatas mettan.