Walstīns Suplīts

Walstīns Suplīts (miksiskai Sopplit anga Supplet) — prūsiskas kriwwis. Miksiskas istōriniks David Lukas en swāise «Prūsiska krōnikei» (1583 m.) gērba kāi pirmasis Prūsas ercōgs, debmistars Ālberts en trīnis kīsmu stesses nōpali stēisan pōliskan laīwan en Semban be Kunnegsgarban madlijjats Suplītan pagalbtwei. Kriwwis pataukinnats augūntun stans laīwans ezze Sembas krantammans sen dāinans be upperan per Dēiwans. Walstīnu prawerēi kīrsnas kūrwan anga wērstin, tāns kwaitēits prei jūrin, en zmūnin (stēisan deīktiskans būrans) pawidai, upperautun stan kūrwan pra tāwan wūran pajuksman. Staddan Suplīts sūbs enbadda kurwan. Dāinas izpalluns, prēisikan laīwai pergūbi prōpaus be auplūwa ezze Sembas krantammans (bilāi di jūrinikai widāwusis stūrnawan, pāustan krāntan; niprawerīngin per ausadīnsenin).
Adder kits naūts pergūbi pa stan upperan prei preijūriskans būrans: sen stan kērdan, kaddan kurwan anga wērstin pastāi enbastan, pra 6 anga 7 mettans, zmūnei ni mazēits zukkautwei. Stesse paggan tenēi turēits nawwan naūtin — alkis. Zmūnei etkūmps madlīwusis Suplītan kāi tāns pagalblai. Suplīts pazināi kāi tāns segēits stan blāndan, en stan subban kērdan kaddan tāns enbadda kurwan be upperau prei jūrin, tāns augunni ni tēr prēisikans, adder zukkans dīgi. Kriwwis gērdawuns kāi tāns waīdats wīdan kāigi etgaūtun zukkans, būrai prawerēi kāuptun kīrsnan skēurin be enmaitātun tennan spārts labbai. Be kaddan skēuri pastāi labbai enmaitātan, kriwwis laipinnuns perpīstun skeūrin be pīwan, kaīgi ānkstais kurwan, prei jūrin prei kāiman Rantawan, kwēi tāns, pagār lāisantei swāise segīsenin sen retawīngins skatīsnans, enbadda, swilla, skajjina be labbai pagattawina stan, labbai enmaitātan, stāran skēurin. Tīt zukkai etwartinnus si prēi Sembas krāntans.